LANMOU

Poukisa ou oblije fè m mete ajenou ?
Ou pini mwen tankou bouskoutou
Ou fè zanmi m yo rele m tisousou
Tandiske tout sa ki nan kè m se pou ou
LANMOU
Ou dous pase rapadou
Mwen pap bay ou pou bijou
Rete kote m toulèjou
Paske san ou m ka fou
LANMOU
Ou toujou ap fè m fouye zo nan kalalou
Ou fè m rele Natacha : Chachou
Ou fè m rele Katya : Katou
Ou fè m rele Nadèj : Nadou
LANMOU
Ou pouse nan kè m tankou rasin mapou
Ou fè m fèmen de je m pou m di: I love you
Mwen santi m rantre lan yon lòt planèt jou pou jou
Lè sa m fèmen de je m pou m di: Ay! Ay! Awi li gou
LANMOU
Depi m pa wè w mwen kagou
Depi m wè w m anvi fè lanmou
Ou bèl tankou bijou kajou
Ou fè m vole ponpe nan chak kalfou

Tankou yon moun ki sou
Lè l fin bwè wonm babankou
Pafwa yo konn menm mande m èske m fou
Mwen di: Non. Tout sa se pou lanmou.

Fevriye 2004